Fano Díaz, José

Militar. Veciño de Ferrol (A Coruña). Tenente coronel de Artillería.

Golpista.

Cando se produce o golpe dos sublevados Fano Díaz era tenente coronel de Artillería e desenvolvía o cargo de segundo xefe do Rexemento de Artillería de Costa nº 2, en Ferrol. O xefe deste rexemento era o coronel Antonio Corsanego Wauters-Horcasitas, quen nese momento se achaba de vacacións na Coruña.

Desde os primeiros momentos do alzamento, José Fano estivo do lado dos rebeldes e contactou cos mandos da cidade de Ferrol (A Coruña) para ver a posición que adoptaban cara o golpe, sendo el un animoso propulsor da declaración do estado de guerra. O día 19 regresou ao rexemento Corsanego, que tamén adoptou esta postura rebelde e sacou as súas tropas ás rúas de Ferrol ata a vitoria dos alzados.

Estivo presente na xefatura da Base Naval, co vicealmirante Indalecio Núñez Quijano, na entrevista que mantiveron o contra-almirante Antonio Azarola Gresillón e o alcalde de Ferrol Antonio Santamaría López, na que se trataba de que o alcalde convencera da súa rendición ás dotacións do cruceiro lixeiro Almirante Cervera e do acoirazado España.

Participou no consello de guerra contra Azarola e en varios consellos de guerra máis.

No ano 1937 ascéndeno a coronel e mandou o Rexemento de Artillería Lixeira nº 16, 8ª Brigada de Artillería da VIII División Orgánica.

Polos seus desacordos coas prácticas represivas sobre os republicanos de Victoriano Suanzes Suanzes trasladárono de xeito forzoso ao Principado de Asturias.