Gasset Alzugaray, Ricardo

Avogado, xornalista e político, 43 anos. Casado con Carmen Dorado Rodríguez de Campomanes. Veciños do Incio (Lugo). O seu pai, Rafael Gasset Chinchilla (+1927) foi ata nove veces ministro de Fomento cos liberais. Ricardo estudou Dereito na Universidade Central de Madrid. Propietario do Hotel Balneario do Incio e da Fábrica de Electricidade de Belesar.

Militou inicialmente no Partido Liberal (PL), obtivo acta de deputado por Ciudad Real en 1916 e, despois, pola Coruña nas eleccións de 1918, 1919, 1920 e 1923, ata a ditadura de Miguel Primo de Rivera Orbaneja.

Durante un tempo dirixiu o xornal familiar El Imparcial de tendencia monárquica.

Partidario da República e militante do Partido Republicano Radical (PRR), designárono gobernador civil da Coruña en 1933, manténdose no cargo ata febreiro de 1934, cando o deixa por diferencias coa dirección do partido de Alejandro Lerroux García.

En xuño de 1934 afiliase a Unión Republicana (UR), que dirixe o seu amigo Diego Martínez Barrio e acadou acta de deputado por Lugo nas eleccións de 1936. Traballou nos relatorios do Estatuto de Autonomía de Galicia (EAG).

Fuxido. Exiliado. Sancionado.

O golpe sorprendeuno no Incio nas propiedades da súa dona; conseguiu pasar á zona republicana en Madrid. Exerceu de subsecretario do Ministerio de Comunicacións, Transportes e Mariña Mercante.

Ao caer a fronte de Cataluña en 1939 foxe a Francia en marzo e instálase en Montauban (Occitania, Francia), onde xestionou unha explotación agraria e acolleu os últimos días do presidente da República Manuel Azaña Díaz, quen morre o día 03/11/1936.

Condenouno en ausencia, en novembro de 1940, o Tribunal Rexional de Responsabilidades Políticas da Coruña a dez anos de inhabilitación especial, oito anos e un día de desterro a máis de 200 quilómetros do Incio e multa de 20.000 pesetas.

Xa no exilio francés foi un baluarte na defensa dos republicanos exiliados e, participou na constitución da Alianza Nacional de Forzas Democráticas (ANFD) e na Unión de Intelectuais Españois (UIE).

Despois do indulto do 09/12/1949, volveu a España.