Torres Sas, Joaquín

Tiña 19 anos. Desertor do Cuartel de Artillería de Montefaro, Ares (A Coruña), onde era artilleiro de 2ª.

Fuxido. Encarcerado.

Detido na emboscada dos falanxistas da noite do 4 ao 5 de setembro de 1936 con varios compañeiros, cando se achegaran á casa de Francisca Pereira, nos Xicos, San Vicente de Regoela, Cabanas (A Coruña). Alí se congregaran Amador Barcia Fernández, Xicos; Arturo Pereira López e Juan Pereira López; Jesús Bouza Pereira; Baltasar López Ardao, Baltasar de Zacotos, e Joaquín Torres Sas, o Soldado. Os falanxistas tiñan rodeada a casa, agochados nun alpendre. Ao descubrilos, Baltasar saíu correndo e matárono; ao resto prendéronos.

Antes do amencer saíron cara Santa Mariña de Sillobre, Fene (A Coruña). A altura de San Marcos, Amador sacou unha navalla que levaba no peto, liberouse das ataduras e conseguiu saltar do camión que os levaba ao cemiterio de Sillobre, onde ían fusilalos. Conseguiu liberar a Torres e a Arturo Pereira; Arturo, ao ver que o seu irmán Juan seguía amarrado, dubidou e prendérono. Amador e Torres fuxiron cada un polo seu lado; Joaquín Torres acadou o río Belelle e agochouse; Amador fuxiu da zona. A Jesús Bouza e a Arturo Pereira e Juan Pereira executáronos no cemiterio de Sillobre. Juan non tiña os 18 anos.

A Torres Sas prendérono en Betanzos (A Coruña) o día 09/04/1941 e condenárono o 06/12/1941 a 30 anos de cadea, logo reducidos a oito anos.

Interno na Prisión Militar do Castelo de San Felipe, en Ferrol, puxérono en liberdade condicional provisoria o día 15/06/1942, que se publicou no BOE nº 178 do 27/06/1942; obrigárono a residir en Trasparga. En agosto dese ano castigárono a cumprir catro anos de recargo como soldado nun batallón disciplinario de traballadores.