Bouza Pereira, Jesús

Labrego. Veciño de Horta. Irmán de Constantino Bouza Pereira, abatido pola Garda Civil o día 02/03/1939; de Vicente Bouza Pereira, encarcerado e José Bouza Pereira, encarcerado. Irmán de Maruja Bouza Pereira, que recibiu malleiras da Garda Civil para que delatara o agocho dos seus irmáns e doutros fuxidos da zona. A un tío seu deportárono a León.

Fuxido. Paseado.

Denunciouno o veciño de Regoela, o falanxista Santiago García Rodeiro. Detido na emboscada dos falanxistas da noite do 4 ao 05/09/1936 con varios compañeiros, cando se achegaran á casa da súa avoa, Francisca Pereira, nos Xicos, Regoela. Alí congregáranse: Amador Barcia Fernández, Xicos; Arturo Pereira López e Juan Pereira López; Jesús Bouza Pereira; Baltasar López Ardao, Baltasar de Zacotos, e Joaquín Torres Sas, o Soldado. Os falanxistas tiñan rodeada a casa, agochados nun alpendre. Ao descubrir aos represores, Baltasar saíu correndo e matárono; ao resto prendéronos.

Antes do amencer saíron cara Sillobre. A altura de San Marcos, Amador sacou unha navalla que levaba no peto, liberouse das ataduras e conseguiu saltar do camión que os levaba ao cemiterio de Sillobre, onde ían ser fusilados. Conseguiu liberar a Torres e a Arturo Pereira; Arturo, ao ver que o seu irmán Juan seguía amarrado, dubidou e prendérono.

Amador e Torres fuxiron cada un polo seu lado. Joaquín Torres acadou o río Belelle e agochouse; Amador fuxiu da zona. A Jesús Bouza, a Arturo Pereira e a Juan Pereira executáronos no cemiterio de Sillobre; Juan non tiña os 18 anos.