Vilas Durán, María del Pilar

Tiña 31 anos. Casada na Coruña, o día 12/10/1927, co propietario, avogado, banqueiro e político José Miñones Bernárdez, Pepe Miñones; tiñan tres fillos e unha filla: Pilar. Veciños da rúa Tabernas, 20, na Coruña.

O seu home militou no Partido Republicano Radical (PRR), logo no Partido Radical Demócrata (PRD) e, finalmente, en Unión Republicana (UR) e elixírono deputado pola Coruña nas Cortes en 1933 e en 1936; socio do Casino Republicano coruñés. Pepe Miñones era masón da loxa Pensamiento y Acción nº 11.

José creou empresas como Hidroeléctrica de la Loma, S.A. (Úbeda, Xaén) ou Electra Popular Coruñesa.

Vítima colateral.

No momento do levantamento militar José púxose do lado do gobernador Francisco Pérez Carballo e tratou, por orde deste, co xeneral Enrique Salcedo Molinuevo co ánimo de mediar entre el e o gobernador pois non se entendían.

Xulgado en consello de guerra na Coruña polo delito de rebelión militar co resultado de sentenza á pena de morte; sancionárono ademais cunha multa de 1.000.000 pesetas e o embargo das súas empresas; executárono no Campo da Rata, Punta Herminia, na Coruña, o día 02/12/1936.

Pepe Miñones era o propietario de Electra Popular Coruñesa, que lle expropiaron e integraron en Forzas Eléctricas del Noroeste, S.A. (FENOSA), propiedade de Pedro Barrié de la Maza, afecto ao Réxime e amigo persoal de Francisco Franco Bahamonde.