Ares López, Juan

Político, 34 anos. Veciño de San Cosme de Nogueirosa, Pontedeume

Presidente da Sociedade Progreso de Labregos de Nogueirosa e tamén da Sociedade Labrega Comarcal do Este da Coruña, que agrupaba 12 entidades de Pontedeume e Miño.

Membro de Esquerda Republicana (ER); co triunfo da Fronte Popular (FP) nas eleccións de febreiro de 1936 elixírono concelleiro de Pontedeume e tenente de alcalde. Desenvolvía este cargo cando se produce o golpe de Estado.

Fuxido. Procesado.

Cando se produce o golpe dos rebeldes formouse o Comité de Defensa da República de Pontedeume, no que coinciden, entre outras persoas, o alcalde Manuel Seijo López; Celestino Sardiña Navarro, de Esquerda Republicana (ER) e delegado do Goberno Civil; Luis Nodar Castro, concelleiro de Pontedeume polo PSOE; Ramón Ares Bouza, membro da Sociedade Labrega de Boebre e os seus lugares; Ángel García Toribio, rexistrador e presidente de ER, e Juan Ares López, tamén de ER, concelleiro e tenente de alcalde na mesma localidade. Ordenaron a requisa de armas para enfrontarse aos golpistas.

Foi un dos que tentou deter o día 21 de xullo, en San Mamede de Laraxe, Cabanas (A Coruña), o paso das tropas que acudían a tomar Pontedeume desde Ferrol.

Logrou agocharse no seu domicilio durante máis de 11 anos e logo escapou ao monte. Acusárono de ser un dos instigadores da resistencia republicana na súa localidade.

Enlace do grupo de José Vázquez Mauriz, Patitas, e despois de Ramiro Martínez López, Zapateiro. Rendeuse e entregouse á Garda Civil en maio de 1949.

Procesado e absolto, finou en 1964, aos 62 anos.