Chacón Winter, Sofía

Casada con Alfredo Suárez Ferrín; tiveron dúas fillas e un fillo: Elisa, Sofía e Luis. Veciños da rúa Riego de Agua, 27-1º, na Coruña. O seu home rexía unha peque fábrica de caldos concentrados da marca FAS.

Alfredo era socio do Casino Republicano coruñés; membro desde 1931 do Partido Republicano Radical Socialista (PRRS); o día 01/01/1934 elixírono alcalde da Coruña e cesárono a finais do mesmo ano como represalia pola revolución de outubro de 1934. Ese mesmo ano Suárez Ferrín abandonou os radicais para unirse a Unión Republicana (UR) e, coa vitoria da Fronte Popular (FP) nas eleccións do 16/02/1936, repuxérono no cardo de alcalde, cargo que desenvolvía no momento do golpe de Estado.

Vítima colateral.

A primeiras horas da noite do 17 de xullo de 1936 chegaban ao Goberno Civil as primeiras novas da sublevación e Francisco Pérez Carballo, gobernador civil, recibía instrucións para convocar aos líderes políticos e sindicais coa fin de facer unha fronte común para defender a legalidade política, referendada nas urnas en febreiro, e organizou o chamado Comité de Defensa da República, igual que o que se formou en todas as cidades e pobos de España; neste comité estivo tamén o alcalde coruñes.

Ao seu home prendeuno o capitán de Artillería Eduardo Ozores Arráiz o día 21 de xullo, ás 16:00 h, no seu domicilio. O seguinte 22, xa en liberdade, asistiu á toma de posesión do alcalde que nomearon os rebeldes, o capitán José Fuciños Gayoso; prendérono de novo horas despois, xulgárono en consello de guerra, condenárono á pena de morte e executárono, o día 31/08/1936, na Punta Herminia, na Coruña.

Á familia Suárez Chacón embargáronlle os seus bens e a viúva e os seus fillos sobreviviron grazas a axuda da familia e amizades. Sofía non volveu saír á rúa.

A Suárez Ferrín procesárono no Tribunal Rexional de Responsabilidades Políticas da Coruña e indultárono no ano 1941.