Fonte Amigo, Eduardo

Veciño de Pontedeume (A Coruña).

Vencellado á UXT de Pontedeume cos concelleiros do PSOE, Luis Nodar Castro e Eduardo Rodríguez Paz; co funcionario do Concello, Ramón Agras Fernández, executado na Capela en agosto de 1936 e con Anselmo Vázquez Rodríguez.

Membro da directiva da Agrupación Socialista (AS) de Pontedeume desde 1934, que presidía o despois alcalde en 1936, Manuel López Seijo, da que era secretario Luis Nodar Castro e na que tamén figuraban Albino Couceiro, José Losada, José-Antonio Fonte e María Vázquez Suárez.

Despois do triunfo da Fronte Popular nas eleccións de febreiro de 1936, o delegado do Goberno Civil, Celestino Sardiña Navarro, designou a nova Corporación de Pontedeume con concelleiros de Esquerda Republicana (ER) e do PSOE. Por este último partido contábanse o alcalde, López Seijo, Luis Nodar, Eduardo Rodríguez Pan e el mesmo, que foi 2º tenente de alcalde.

A nova corporación destituíu a varios funcionarios municipais por estaren implicados na desaparición de documentación oficial: o secretario, Ramón Álvarez Placer; o oficial da secretaría, Indalecio Cabana Carrillo; o depositario de fondos, Pío Rosado Fajardo; o recadador de arbitrios, Ramón Fernández Lamas e os gardas municipais Nicolás Villar Martínez, Jesús Cuíña Placer e Antonio Couso Sierto.

Esta corporación apoiou o Estatuto de Autonomía de Galicia (EAG), a incautación dos cemiterios, a creación dunha biblioteca municipal, obras de urbanización e a construción dun mercado municipal.