García Lugrís, Manuel

Patrón de pesca, 32 anos. Veciño de San Cosme de Maianca, Oleiros. Patrón da tarrafa de Mera María Helena J. Irmán de Juan-Antonio García Lugrís, fuxido e encarcerado e de Andrés García Lugrís, procesado.

Encarcerado.

O día 07/10/1937 ás 04:00 h varias persoas fanse co dominio da tarrafa María Helena J, de Mera, e condúcena cara Francia, chegando a Saint-Nazaire (Países do Loira, Francia) o día 09/10/1937. Varios dos tripulantes están implicados na acción; ao patrón, Manuel García Lugrís, que se opón á fuxida, déixano na lancha auxiliar en Cabo Prior.

Desde Francia, aos nove fuxidos envíanos a España á zona republicana e estiveron nas frontes de Barcelona e Valencia; a tripulación que non deserta volve ao porto de Celeiro (Lugo). A tarrafa era propiedade do médico de Mera, Ramón Juega López.

Os nove escapados eran: Pedro Hidalgo Longueira, mariñeiro; Rafael-José Patiño García, carpinteiro; Juan Temprano Lugrís; Juan-Antonio Neira Moscoso, mariñeiro; os irmáns Manuel Irajo Lago e Francisco Irajo Lago; Andrés Siso Longueira, mariñeiro; Juan-Antonio García Lugrís, mariñeiro, e José Illanes Barreiro.

Xulgado en consello de guerra en Ferrol (A Coruña) polo delito de adhesión á rebelión co resultado de sentenza a un mes de prisión.