Granja González, Ramiro

Funcionario e sindicalista, 47 anos. Casado con Balbina Barcala; tiñan seis fillos. Veciños de Santa Baia de Donsión, Lalín. Axente executivo para o cobro de impostos municipais.

Dirixente no ano 1931 da Sociedade Obreira de Ponte-Nova, de Donsión, da que era presidente en 1936.

Paseado. Desaparecido.

Ao producirse o alzamento rebelde acudiu a Lalín para reunirse co alcalde.

A Ramiro prendérono o día 01/09/1936 e ingresárono no cuartel de Falanxe, onde o torturaron e obrigaron a asinar unha declaración que o inculpaba e a entregar os libros da sociedade, isto permitiu máis arrestos de veciños.

O día 04/11/1936 trasladárono á Colonia Penitenciaria da Illa de San Simón, Redondela (Pontevedra), de onde o sacaron o día 9 do mesmo mes, con outras dez persoas de Lalín e Arbo, para asasinalos na Volta do Couto.

Morto por disparos nun traslado. Semella que os fascistas o pasearon e soterraron en Tenorio nunha fosa común.

Morte rexistrada en Tenorio con outros cinco veciños de Lalín e cinco máis de Arbo.

Nese lugar e data os represores asasinaron a seis lalinenses: Luis Frade Pazos, labrego; Eliseo Garra Lalín, funcionario; Ramiro Granja González, funcionario; José López Bermúdez; José-María Montouto Rodríguez, labrego, e Luis Varela Sobrado, canteiro. Outros cinco executados eran naturais de Arbo (Pontevedra): Juan Alonso Pérez, mestre; Alfonso Alonso Portugués, empresario agrario; José Gómez Sampayo, médico; Antonio Picallo Buela, vendedor de xornais, e Telmo Rodríguez Alonso, pensionista.