Montouto Rodríguez, José-María

Labrego e sindicalista, 46 anos. Casado con Rosa Abeledo; tiñan oito fillos. Veciños de Donsión.

Dirixente da Sociedade Obreira de Ponte Nova, Donsión, da que fora un dos seus fundadores e na que desenvolveu o cargo de vicesecretario no ano 1931.

Encarcerado. Paseado.

Detivérono os franquistas o día 09/09/1936 e ingresárono no cárcere de Lalín ata o día 04/11/1936, data na que o trasladaron á Colonia Penitenciaria da Illa de San Simón, Redondela (Pontevedra), de onde o sacaron coa desculpa dun traslado o día 9 dese mesmo mes, con outras dez persoas de Lalín e Arbo, para asasinalas na Volta do Couto.

Morte rexistrada en Tenorio con outros cinco veciños de Lalín e cinco máis de Arbo.

Nese lugar e data finaron asasinados polos represores seis lalinenses: Luis Frade Pazos, labrego; Eliseo Garra Lalín, funcionario; Ramiro Granja González, funcionario; José López Bermúdez; José-María Montouto Rodríguez, labrego, e Luis Varela Sobrado, canteiro. Outros cinco executados eran naturais de Arbo (Pontevedra): Juan Alonso Pérez, mestre; Alfonso Alonso Portugués, empresario agrario; José Gómez Sampayo, médico; Antonio Picallo Buela, vendedor de xornais, e Telmo Rodríguez Alonso, pensionista.

Nunha causa militar aberta contra da súa persoa infórmase da súa morte nun traslado.

A súa dona inscríbeo no ano 1943 no Rexistro Civil de Lalín como desaparecido.