Miguel Frechilla, Primitivo

Mecánico e sindicalista, 34 anos. Casado con Purificación Martínez Regueiro, tiñan catro fillos. Veciños da Coruña. Empregado do Ferrocarril.

Militante do PCE e do Socorro Rojo Internacional (SRI).

Encarcerado. Executado.

Xulgado en consello de guerra na Coruña o día 05/08/1936 polo delito de rebelión militar, na causa 243/36, co resultado de sentenza a cadea perpetua.

Pena ordinaria conmutada pola comisión de exame de penas da Coruña.

Despois do golpe militar internárono os franquistas na Prisión Provincial da Coruña, da que o sacaron o día 12/01/1937 para levalo a Pamplona (Navarra). Con el sacaron a Enrique Rosende Calvo, o secretario do Sindicato de Camareiros e do Centro de Estudos Sociais Germinal; a Manuel Vázquez González, conserxe do local de Esquerda Republicana (ER); Jaurés García García, Jaurés da Lixivia; José-María Eirís Carro e Leovigildo Taboada Alvarellos. So chegaron a Pamplona el e os dous primeiros; a Eirís, Jaurés e Leovigildo asasináronos no Campo da Rata, na Coruña, en aplicación da Lei de Fugas.

Trasladado ao penal de San Cristóbal, onde ingresa o día 14/01/1937 con Manuel Vázquez González e Enrique Rosende Calvo.

Participa na organización do intento de fuga masiva do día 22/05/1938; capturárono e reingresárono o día 25/05/1938.

Trasladado á Prisión Provincial de Pamplona o día 04/06/1938 e xulgado polo delito se ser un dos organizadores da fuga masiva co resultado de sentenza á pena de morte.

Fusilárono os golpistas ás 06:00 h na Vuelta del Castillo.

A súa dona, Purificación, cando se decatou da súa morte e chea de dor, tirouse ao mar cun dos seus fillos nos brazos; rescatáronos uns mariñeiros. Purificación traballou despois na Fábrica de Mistos.