Pascua Galiano, Fernando de la

Militar, 30 anos. Veciño de Cartagena (Murcia). Mariño da Armada, 3º maquinista do Submarino B-6, alférez graduado. No ano 1922 xa traballaba no Taller de Maquinaria do Arsenal de La Carraca, en San Fernando; en novembro dese ano 1922 era aprendiz de maquinista da Armada. Participou nas campañas da guerra de África. Acadou o grao de 3º maquinista en 1932.

Executado.

Ao Submarino B-6 afundírono as tropas rebeldes no Combate do Cabo de Peñas o día 19/09/1936, afundimento que procurou o propio comandante do B-6 Óscar Scharfhausen Kebbon; á dotación prendérona os rebeldes e conducírona a Ferrol.

Xulgado en consello de guerra en Ferrol, o día 14/10/1936, polo delito de rebelión (causa contra a tripulación do Submarino B-6) co resultado de sentenza á pena de morte.

Fusilárono os golpistas na Punta do Martelo do Arsenal, en Ferrol.

O día 3 de novembro executaron na Punta do Martelo do Arsenal de Ferrol aos seguintes tripulantes do Submarino B-6: Juan Cumbrera González, 35 anos, 2º maquinista; Pedro-Antonio Vera Rodríguez, 27 anos, fogueiro; José Chorro Muñoz, 29 anos, cabo de artillería; José Navarro Díaz, 36 anos, fogueiro; Teodoro López Camazón, 34 anos, auxiliar 1º electricista; Fernando de la Pascua Galiano, 30 anos, 3º maquinista; José Guerrero Giménez, 30 anos, auxiliar 2º radiotelegrafista; Andrés Navarro Barcelona, 29 anos, 3º maquinista; Víctor Bermúdez Bouza, 36 anos, auxiliar 2º de máquinas e Luis Preciados Rodríguez, 23 anos, cabo.

Condenaron a cadea perpetua a: Luciano Amado Muíños, 25 anos, cabo radiotelegrafista; Antonio Arregui Azcárate, 24 anos, cabo electricista; Vicente Carreño González, 23 anos, mariñeiro de 2ª; Martín Hernández Jerez, 23 anos, mariñeiro de 2ª; José Piñeiro Alonso, 24 anos, mariñeiro de 1ª; Remigio Rodal García, 20 anos, mariñeiro de 2ª; Laureano Rodríguez Fernández, 31 anos, auxiliar 2º naval e Lázaro Tudela García, 23 anos, mariñeiro enfermeiro.