Redondo Senra, Rufino

Mestre e político, 24 anos. Casado con María-Angélica Aneiros Menéndez, Ñata, quen fuxiu á República Arxentina, co seu fillo Fernando, seguindo as recomendacións de Rufino nunha carta da véspera da súa execución. Veciños de San Sebastián de Devesos, Ortigueira (A Coruña). Estudou Maxisterio na Escola Normal de Santiago de Compostela (A Coruña). En 1933 era mestre interino en Santa María de Mera de Arriba e, co tempo, mestre nacional de Devesos.

Secretario de Esquerda Republicana (ER) en Cerdido (A Coruña) e concelleiro de Cedeira en 1936.

Depurado. Executado.

Detido polos fascistas, na súa escola, ao mesmo tempo que outros políticos de Cedeira.

Depurárono de xeito definitivo como mestre no mes de novembro de 1936.

Xulgado en consello de guerra sumarísimo en Ferrol polo delito de rebelión militar, na causa 296/36, co resultado de sentenza á pena de morte.

O día 18 de decembro os franquistas fusilaron no Castelo de San Felipe, en Ferrol, a: Enrique Alonso Teijeiro, mestre; Antonio Ameneiro Brage, labrego; Adolfo Bouzón Teijeiro, mariñeiro; Antonio Castillo Domínguez, veterinario; José-Cipriano Durán Fraguela, labrego; Manuel Fernández Freijeiro, militar; Ginés Fernández Rodríguez, estudante (fillo de Manuel Fernández Freijeiro), Miguel Fernández Santos, funcionario; Isaac Forneiro Barandela, mestre; Antonio Iglesias Freire, mariñeiro; José Lago Beceiro, labrego; Enrique Martínez Teijeiro, chofer; Rufino Redondo Senra, mestre, e Francisco Rodríguez N., barbeiro e músico.

Todos eran veciños de Cedeira, agás Antonio Ameneiro, que era de Cabanas (A Coruña).

Soterrárono no cemiterio de San Salvador de Serantes, Ferrol.