Sarille Tellado, Bonifacio

Labrego, político e sindicalista, 41 anos. Veciño de San Cibrao de Montecubeiro, Castroverde.

Presidente da Sociedade Labrega Unión de Labradores de Montecubeiro de 1931 a 1936. Concelleiro de Castroverde en 1931 e, pola Fronte Popular (FP), no ano 1936.

Fuxido. Exiliado.

Despois do golpe militar, Bonifacio Sarille Tellado, líder de Unión de Labradores de Montecubeiro, fuxiu ao monte con dous compañeiros, cando era buscado para asasinalo. Diante do temor dos franquistas de que formara un grupo guerrilleiro co apoio dos veciños, comezaron a represión coñecida pola “Masacre de Montecubeiro”.

Por medio dunha listaxe, que confeccionaron o cura local e un falanxista da zona, eliminaron 15 persoas.

Os executados entre agosto e outubro de 1937 foron: José Blanco García, labrego; Domingo Fernández Díaz; José Freire Millares; José Graña Rico, labrego; Manuel Graña Rico, labrego; Manuela Graña Rico, traballo na casa; Manuel López López, labrego; Virginia Meilán Varela, costureira; José Palmeiro Valcárcel, militar; Antonio Pereira Calderón, labrego; Argimiro Rico Trabada, mestre (tío dos irmáns Graña Rico); Carmen Sarille Lanceiro, traballo na casa; José Veiga López, muiñeiro, e dous descoñecidos.

Bonifacio pasa a Portugal despois de conseguir un pase de fronteira do Cuartel do Xeneralísimo en Salamanca.

Posteriormente exiliouse na República Arxentina, vía Lisboa (Portugal).