Antela Conde, José

Camareiro e político, 36 anos. Veciño de Santa Cristina de Lavadores, en Vigo.

Membro da UXT e da Agrupación Socialista (AS) de Lavadores. Alcalde de Lavadores durante a II República, de 1931 a 1934 e no ano 1936. Irmán de Luis Antela Conde, tamén executado.

Executado.

Cando se produce o golpe rebelde en Vigo, o día 20 de xullo e mentres se lía o bando declarativo do estado de guerra, os sublevados asasinaron a 15 veciños; Antela opúxose nun primeiro momento á entrega de armas para facer fronte aos rebeldes. Desde ese momento e ata o día 23 de xullo houbo unha certa resistencia contra os golpistas por parte das xentes da Fronte Popular (FP), os da UXT, a CNT e a Federación Anarquista Ibérica (FAI). Unha vez que fracasou este intento de resistencia a moitos dirixentes obreiros, líderes políticos e veciños sen adscrición, prendéronos.

Antela presentouse de xeito voluntario o día 17/08/1936, acompañado do cura de Mos e dun oficial do Exército, diante dun xuíz de Vigo cando soubo que o reclamaban.

Xulgado en consello de guerra sumarísimo en Vigo o día 22/08/1936 polo delito de traizón, na causa 140/36, co resultado de sentenza á pena de morte e accesoria de multa de un millón de pesetas.

Ás 05:30h fusilaron nos muros do cemiterio de Pereiró, en Vigo, a: José Antela Conde, camareiro; os irmáns Antonio Bilbatúa Zubeldía, funcionario, e Demetrio Bilbatúa Zubeldía, fotógrafo; Enrique-Heraclio Botana Pérez, tipógrafo; Ubaldo Gil Santóstegui, médico; Ramón González Brunet, funcionario; Emilio Martínez Garrido, industrial; Manuel Rey Gómez, mariñeiro; Ignacio Seoane Fernández, panadeiro, e Apolinar Torres López, mestre.

Morte rexistrada en Vigo por ferida de arma de fogo.