González Brunet, Ramón

Funcionario, político e sindicalista, 50 anos. Veciño de Santa Cristina de Lavadores, Vigo. Funcionario municipal na Casa do Pobo.

Militante da UXT, da que era dirixente en Vigo, e da Agrupación Socialista (AS) de Vigo. Sufriu represión despois da folga xeral de 1917 e durante a ditadura de Miguel Primo de Rivera Orbaneja.

Concelleiro de Vigo nas eleccións de 1931 que deron lugar á proclamación da II República. Secretario da Federación Provincial Socialista de Pontevedra e da Comisión Executiva da Federación Local de Traballadores da UXT en Vigo.

Executado.

Despois do golpe dos rebeldes escondeuse na taberna El Recreo de Benito Alonso Valiñas e de Angelina Montero Franqueira (pais de Xesús Alonso Montero) onde o arrestaron os fascistas o día 03/08/1936.

Xulgado en consello de guerra sumarísimo en Vigo o día 22/08/1936 polo delito de rebelión militar, na causa 142/36, co resultado de sentenza á pena de morte.

Ás 05:30 h fusilaron nos muros do cemiterio de Pereiró, en Vigo, a: José Antela Conde, camareiro; os irmáns Antonio Bilbatúa Zubeldía, funcionario, e Demetrio Bilbatúa Zubeldía, fotógrafo; Enrique-Heraclio Botana Pérez, tipógrafo; Ubaldo Gil Santóstegui, médico; Ramón González Brunet, funcionario; Emilio Martínez Garrido, industrial; Manuel Rey Gómez, mariñeiro; Ignacio Seoane Fernández, panadeiro, e Apolinar Torres López, mestre.