Carbón Fornos, Ramiro

Labrego, 25 anos. Veciño de Soaserra.

Fuxido. Morte en enfrontamento.

Foxe en 1937 para evitar a mobilización e incorporouse á guerrilla nese ano. Non tiña familia e era un home caracterizado pola súa bondade.

Na primavera de 1944 organizou, con Manuel Eive Vilar, Evaristo Eive Vilar, Ramiro Martínez López, Zapateiro, e José Vázquez Mauriz, Patitas, un grupo guerrilleiro na comarca do Eume no que moitos dos integrantes eran desertores da Base Naval de Ferrol (A Coruña). Entre eles atopábase Manuel Piñeiro Antón, Manolo do Menor. Dirixía, xunto cos irmáns Eive, un grupo duns 20 guerrilleiros antifranquistas. Nese ano tamén dirixiu un grupo na Capela (A Coruña).

O día 23/02/1945 matou ao miliciano José Rodríguez.

Asasinado nunha emboscada da Garda Civil, logo dunha delación, no monte Teixeiro, en Cabalar (entre Formariz e Vilar de Mouros, na Capela).

O seu cadáver apareceu en Formariz, Cabalar. Acompañábao Antonio Vilar Pereira, que puido fuxir. Ramiro morreu dun tiro da Garda Civil.

Por mor da súa morte ábrese a causa 119/46 en Ferrol e que rematou sobresida.

A guerrilla puxo o seu nome a un destacamento do Exército Guerrilleiro de Galicia (EGG), o Destacamento Eive-Carbón, que comandou José-Antonio López Jaspe, Antonio, Marinero, o Antoñito.