Gil Santóstegui, Ubaldo

Médico e político, 57 anos. Veciño da rúa Porta do Sol, en Vigo. Licenciado en Medicina pola Universidade de Santiago de Compostela (USC) no ano 1905. Exerceu a Medicina en Vigo e Pontevedra; no ano 1913 foi dos primeiros en dispor dos raios X.

Membro do PSOE e da UXT. Deputado provincial en 1921. Nas municipais de 1931 elixírono concelleiro de Vigo e exerceu de tenente de alcalde. En 1923 presentouse a Cortes polo PSOE da Estrada (Pontevedra) pero non obtivo acta. Novamente concelleiro de Vigo en 1931 e acadou a alcaldía.

Executado.

Cando se produce o golpe dos sediciosos arrestárono nos primeiros días.

Xulgado en consello de guerra sumarísimo en Vigo, o día 22/08/1936, polo delito de traizón, na causa 142/36, co resultado de sentenza á pena de morte.

Ás 05:30 h fusilaron nas tapias do cemiterio de Pereiró, en Vigo, despois de sacalos da cadea do Castelo do Castro, a: José Antela Conde, camareiro; os irmáns Antonio Bilbatúa Zubeldía, funcionario, e Demetrio Bilbatúa Zubeldía, fotógrafo; Enrique-Heraclio Botana Pérez, tipógrafo; Ubaldo Gil Santóstegui, médico; Ramón González Brunet, funcionario; Emilio Martínez Garrido, industrial; Manuel Rey Gómez, mariñeiro; Ignacio Seoane Fernández, panadeiro, e Apolinar Torres López, mestre.