Goded Llopis, Manuel

Militar, 53 anos. En 1896 ingresou na Academia de Infantería de Toledo. En 1905 era capitán de Estado Maior. Participou na Guerra de Marrocos, onde ascendeu en 1924 a coronel por méritos de guerra e dous anos despois, en 1926, a xeneral de brigada. Foi xefe do Estado Maior de José Sanjurjo Sacanell. Nomeárono xeneral de división en 1927.

Na II República designárono xefe do Estado Maior Central do Exército e, logo, cesárono polas súas manifestacións contra a República no coñecido como Incidente de Carabanchel.

Participou no golpe de Estado do xeneral José Sanjurjo Sacanell, a "Sanjurjada", e por este motivo retirárono da actividade militar. Máis tarde amnistiouno o executivo de Alejandro Lerroux García.

En 1934 colaborou con Francisco Franco Bahamonde na represión da "Revolución de Asturias". En 1935 ingresou na organización clandestina Unión Militar Española (UME). En 1936, a súa pouca sintonía coa Fronte Popular (FP), afastouno de Madrid e destinárono como comandante xeral de Baleares.

Golpista. Axustizado.

Implicado na sublevación militar, os revoltosos designárono para que se fixera cargo da xefatura da rebelión en Barcelona. Primeiro optábase para esta misión polo xeneral Manuel González Carrasco pero a oposición da oficialidade de Cataluña confirmou a Goded e González Carrasco pasou a ocuparse de Valencia. De xeito provisorio tomaría o mando o xeneral Álvaro Fernández Burriel, que estaba ao mando da 2ª Brigada de Cabalería da IV División Orgánica en Barcelona. Despois de declarar o estado de guerra e facerse co control de Mallorca e de Eivisa para os sediciosos, marchou a Barcelona, onde destituíu ao xeneral Francisco Llano de la Encomienda, pero fracasou no intento de controlar a cidade e tivo que renderse cando o xeneral José Aranguren Roldán lle negara o apoio da Garda Civil.

Arrestado polas autoridades republicanas o mesmo día 19/07/1936 con Fernández Burriel e obrigado a confesar pola radio o fracaso do levantamento en Cataluña e a súa rendición. Esta mensaxe deu ánimos aos partidarios da República en todo o país. Ingresárono no buque-prisión Uruguai.

O día 11/08/1936 xulgárono no Uruguai en consello de guerra polo delito de traizón co resultado de sentenza á pena de morte.

Fusilado con Fernández Burriel o día 12 seguinte no Castelo de Montjuic, Barcelona.