González Álvarez, Basilio

Labrego, 23 anos. Veciño do barrio da Igrexa, San Cristovo de Candeán, Vigo. Mariño da Armada, mariñeiro pola súa quinta, mariñeiro de artillería no cruceiro lixeiro Libertad.

Encarcerado.

Combateu no exército republicano no decorrer da guerra civil.

Xulgado en consello de guerra en Ferrol (A Coruña) polo delito de rebelión militar co resultado de sentenza a un ano de cadea.

Indultárono no mes de outubro de 1939.

Cando se produce o golpe militar a dotación deste cruceiro Libertad prendeu á oficialidade golpista e fíxose co control do barco para a República.

Axustizaron neses días ao comandante do cruceiro Hermenegildo Franco Salgado-Araujo, ao 2º comandante Juan-Antonio Garat Rull e ao alférez de navío Francisco-José Núñez Iglesias.

Á dotación leal á República procesárona ao remate da guerra, cos seguintes castigos:

Condenaron á pena de morte a: Ramón Gómez Prieto, 32 anos, fogueiro preferente e Enrique Gradaille Vilaboy, 26 anos, cabo de mariñeiría.

Castigaron a cadea a: o cabo de mariñeiría José Fonticoba Díaz, 22 anos, a 12 anos e un día e os mariñeiros Juan Rodríguez Crespo, 20 anos, a 12 anos de cadea; Jesús Pazos Rosales, 29 anos, a seis anos e un día; Valentín González Martínez, 32 anos, a dous anos e Basilio González Álvarez, 23 anos, a un ano.

Encarceraron a: José Leira Regueiro, 20 anos, fogueiro, e os mariñeiros José Lorenzo Brage, 20 anos e Benjamín Pampillón Davila, 30 anos.

Declararon fuxidos e en rebeldía: o alférez de navío José-Luis Souto López de Neira, 28 anos; o auxiliar de artillería Víctor San Telesforo Villar, 24 anos; o maquinista naval Enrique Varela Casas; os cabos Abelardo Fernández López, 24 anos; Pedro Fernández Montero, 33 anos; Emilio Parga Gómez, 24 anos e Eugenio Porta Rico, 23 anos, e os mariñeiros José Rodal Blanco, 22 anos e Antonio Vázquez Fernández, 19 anos. Absolveron no proceso: os cabos Jesús Allegue Dopico, 22 anos; José Bértola Canosa, 22 anos; Manuel Lorenzo Eiras, 22 anos e Constantino Ríos Ramil, 23 anos, e os mariñeiros Cándido Barreiro Pena, 22 anos; Alejandro Leal Pacheco, 24 anos; Juan-Antonio Meizoso Casal, 28 anos e Lisardo del Río Pazos, 22 anos.