Franco Salgado-Araujo, Hermenegildo

Militar, 56 anos. Casou con Humbelina González-Llanos Caruncho. Mariño da Armada, capitán de navío e comandante do cruceiro lixeiro Libertad. Irmán de Francisco Franco Salgado-Araujo, tamén golpista, e curmán de Francisco Franco Bahamonde.

Golpista. Axustizado.

Cando se produce o golpe dos militares rebeldes, Hermenegildo era o comandante do cruceiro Liberdad. Cando o buque se situou fronte as costas de Cádiz, cidade tomada polos rebeldes, o seu comandante negouse a acatar as ordes do Goberno de Madrid de bombardear a cidade.

A mariñeiría, leal á República, diante desta actitude do comandante decide facerse co control do cruceiro, arrestando e incomunicando a todos os oficiais. Ao segundo comandante, o capitán de corveta Juan-Antonio Garat Rull, ao alférez de navío Francisco-José Núñez Iglesias e a outros oficiais axustizáronos o día 3 de agosto seguinte. Hermenegildo Franco, a quen feriran nestas accións e que se achaba na enfermería, finou axustizado nos días seguintes.

Á dotación deste cruceiro procesárono os franquistas ao remate da guerra, cos seguintes resultados:

Condenaron á pena de morte a: Ramón Gómez Prieto, 32 anos, fogueiro preferente e Enrique Gradaille Vilaboy, 26 anos, cabo de mariñeiría.

Sentenciaron a cadea: o cabo de mariñeiría José Fonticoba Díaz, 22 anos, a 12 anos e un día e os mariñeiros Juan Rodríguez Crespo, 20 anos, a 12 anos de cadea; Jesús Pazos Rosales, 29 anos, a seis anos e un día; Valentín González Martínez, 32 anos, a dous anos e Basilio González Álvarez, 23 anos, a un ano.

Remataron presos de guerra: José Leira Regueiro, 20 anos, fogueiro, e os mariñeiros José Lorenzo Brage, 20 anos e Benjamín Pampillón Davila, 30 anos.

Declararon fuxidos e en rebeldía: o alférez de navío José-Luis Souto López de Neira, 28 anos; o auxiliar de artillería Víctor San Telesforo Villar, 24 anos; o maquinista naval Enrique Varela Casas; os cabos Abelardo Fernández López, 24 anos; Pedro Fernández Montero, 33 anos; Emilio Parga Gómez, 24 anos e Eugenio Porta Rico, 23 anos, e os mariñeiros José Rodal Blanco, 22 anos e Antonio Vázquez Fernández, 19 anos.

Absolveron no proceso: os cabos Jesús Allegue Dopico, 22 anos; José Bértola Canosa, 22 anos; Manuel Lorenzo Eiras, 22 anos e Constantino Ríos Ramil, 23 anos, e os mariñeiros Cándido Barreiro Pena, 22 anos; Alejandro Leal Pacheco, 24 anos; Juan-Antonio Meizoso Casal, 28 anos e Lisardo del Río Pazos, 22 anos.