Lema Sendón, Francisco

Industrial e político, 60 anos. Veciño de Vimianzo. Dono dun café, bar e comercio na súa localidade.

No ano 1919 era presidente da Sociedade de Gandeiros de Castrelo e Berdoias, en Vimianzo.

Despois do triunfo da Fronte Popular (FP) en febreiro de 1936 nomeárono concelleiro vimiancés.

Fuxido. Encarcerado.

Logo de que se producira o golpe de Estado, o alcalde José Alborés Gándara, Cordas "o 22 de xullo para dar sensación de fortaleza, asaltou o castelo de Vimianzo, propiedade de Ramón e Mercedes Martelo de la Mata, coa intención de facelo sede do concello; acompañárono Andrés García Ferreiro (secretario do concello), Manuel Alborés Gándara, Víctor Vázquez Varela, Alejandro Lema Trillo, Francisco Lema Sendón, Manuel Lorenzo Pérez, Eliseo-Antonio Lastres López e Segundo, o Xalleiro” (texto do cóengo da Catedral de Santiago de Compostela, Manuel Silva Ferreiro, do ano 1938 Galicia y el Movimiento Nacional: páginas históricas).

Prendérono os franquistas, logrou escapar e estivo en fuga ata o ano 1939.

Xulgado en consello de guerra na Coruña polo delito de rebelión co resultado de sentenza a cadea perpetua.

Pena ordinaria conmutada pola comisión de exame de penas da Coruña.

Abríronlle un expediente por responsabilidades políticas no ano 1940.