Lorenzo Pérez, Manuel

Zapateiro, 33 anos. Casado con Carmen Trillo, procesada. Veciños de Vimianzo. Irmán de José Lorenzo Pérez, tamén encarcerado.

Encarcerado.

Logo de que se producira o golpe de Estado o alcalde José Alborés Gándara, Cordas "o 22 de xullo para dar sensación de fortaleza, asaltou o castelo de Vimianzo, propiedade de Ramón e Mercedes Martelo de la Mata, coa intención de facelo sede do concello; acompañárono Andrés García Ferreiro (secretario do concello), Manuel Alborés Gándara, Víctor Vázquez Varela, Alejandro Lema Trillo, Francisco Lema Sendón, Manuel Lorenzo Pérez, Eliseo-Antonio Lastres López e Segundo, o Xalleiro” (texto do cóengo da Catedral de Santiago de Compostela, Manuel Silva Ferreiro, do ano 1938 Galicia y el Movimiento Nacional: páginas históricas).

Xulgado en consello de guerra na Coruña polo delito de rebelión, na causa 515/37, co resultado de sentenza a 20 anos de prisión.

Neste xuízo castigaron a cadea perpetua a: Eliseo-Antonio Lastres López, José Mouzo Díaz e Cándido Rodríguez Caamaño; penas de 20 anos de cadea para: Jesús Conde Lema e Manuel Lorenzo Pérez; sentenzas de 12 anos de prisión para: José Lorenzo Pérez, Manuel Lourido Pérez, Andrés Tajes Miñones e José Tajes Tajes; ditaron auto de absolución para Fernando Broncano Ciprián.

Pena ordinaria conmutada pola comisión de exame de penas da Coruña.

Interno na Prisión Provincial da Coruña, publicaron a súa liberdade condicional no BOE nº 151 do día 31/05/1941.

Procesárono no Tribunal Militar Territorial da Coruña na causa 200/47 por auxilio a malfeitores, o día 12/12/1947, con outros 68 veciños.

Para ver todos os procesados na causa 200/47 dirirxe á ficha de Alfredo Agra Blanco.