López Gómez, Luis

Pintor. Veciño da Coruña. Soldado pola súa quinta no Rexemento de Infantería Zamora nº 29, 15ª Brigada de Infantería da VIII División Orgánica na Coruña.

Cadro da Sección de Pintores do Sindicato Único do Ramo da Construción na Coruña, da CNT.

Executado.

Implicárono na tentativa de levantamento no Cuartel de Infantería da Coruña do 20/10/1936.

Xulgado na Coruña nun proceso sumarísimo polo delito de sublevarse contra os seus mandos co resultado de sentenza á pena de morte.

Morte rexistrada na Coruña a causa de ser pasado polas armas en cumprimento do artigo 4º do bando declarativo do estado de guerra.

Fusilaron no Campo da Rata, na Coruña, a media tarde e con gran expectación, os seguintes militares de quinta do cuartel de Infantería da Coruña: Antonio Barreiro Méndez, Manuel Ferreiro Novo, Juan González Horta, Luis López Gómez, Fernando Negreira Sánchez, Luis Neira Suárez, Manuel Obelleiro Meijide e Manuel Seoane Díaz.

Soterrárono o día 24 de outubro nunha fosa común no cemiterio de San Amaro, na Coruña, con Antonio Barreiro Méndez, Cristóbal Feliú Lourido, Manuel Ferreiro Novo, Juan González Horta, Tomás Longueira Bermúdez, Fernando Negreira Sánchez, Luis Neira Suárez, Manuel Obelleiro Meijide, Manuel Pallarés Villares, Melchor Pita Díaz, Adolfo Ponte Rodríguez e Manuel Seoane Díaz.

A estes oito homes acusáronos, pola denuncia dun recruta de Buño, Malpica de Bergantiños (A Coruña), de planear o asasinato dos oficiais do seu acuartelamento.