Otero Montes, Avelino

Xornaleiro, 19 anos. Veciño do barrio do Sello. Ao seu irmán maior José Otero Montes paseárono en 1936.

Militante do PCE e afiliado ao Ateneo Comunista de Cabral.

Fuxido. Encarcerado. Morte en enfrontamento.

Mobilizárono en 1937 os golpistas e logrou pasarse ao bando leal á República.

Detido polos sublevados en Valencia o día 31/03/1939 e condenado a prisión. Pasou por varios campos de concentración; saíu en liberdade vixiada en abril de 1942 e finalmente obrigárono o a incorporarse a un rexemento de Zaragoza. Pasou pola cadea de Mozarrifar (Zaragoza), saíu en liberdade vixiada en abril de 1942 e volveu a Cabral.

Reclamado de novo polas autoridades militares de Zaragoza decidiu botarse ao monte e integrouse no grupo de José García Molares, Maletas, en 1943.

No ano 1946 pasou ao Destacamento Paco Barreiro da V Agrupación do Exército Guerrilleiro de Galicia (EGG), que mandaba Manuel Simón Campos, Xanote, e do que foi o seu secretario político.

Por este destacamento pasaron: Agustín Álvarez Araujo; Basilio Calvar Solla, o Roxo de Domaio; Estanislao Cantero Izquierdo; Urbano Fernández Bastos, Fotógrafo, Roque; José García Molares, Maletas; Aurelio Gil Méndez; Avelino Otero Montes, Avelino; Ramón Pereira Antelo, o Parrillero; Claudio Rodríguez Vázquez, Penís, Crispín, e Manuel Simón Campos, Xanote.

Acusárono xunto con Manuel Simón Campos, Xanote, da morte do falanxista de Cabral, Eusebio Lago Campos, feito que acontecera o día 30/01/1947.

O dia 20/05/1947 houbo unha reunión da guerrilla na zona de Monte Poulo, Lavadores. Alertada a Garda Civil por un axente infiltrado no grupo, montaron un operativo no Alto de San Paio para sorprender aos líderes guerrilleiros cando regresaran da reunión.

Morreu o día 21/05/1947 en San Paio, preto de Lavadores, nun enfrontamento coa Garda Civil, xunto con Manuel Simón Campos; semella que se suicidaron cando se sentiron acurralados. Na acción detiveron a dous compañeiros: Ramón Villar Paz e Eladio Covelo Álvarez, e a varios enlaces. A operación relacionouse coa actuación dun axente infiltrado, posiblemente Alejo-Pablo Mora García.