Brión Suárez, Manuel

Labrego e político, 50 anos. Solteiro. Veciño de Cabo de Cruz. Emigrou a América e, ao seu regreso, abriu en Cabo de Cruz o ultramarinos e casa de comidas O Paxaro Pinto.

Pertencía á Agrupación Socialista (AS) e a UXT de Boiro. Secretario da Sociedade Labrega e de Oficios Varios de Cabo de Cruz. Concelleiro en Boiro logo do triunfo da Fronte Popular (FP) en febreiro de 1936.

Tiña como compañeiros de corporación, entre outras persoas, a: José Martínez Virel, procesado; Rodrigo Álvarez Gantes, asasinado; Antonio Lago Outeiral, encarcerado; José Caballero Rubio, asasinado; Brígida Muñiz Suárez, encarcerada; Juan-Francisco Outeiral Outeiral, executado; José-Benito Segade Torrado, encarcerado.

Depurado. Fuxido. Paseado. Sancionado.

Co golpe de Estado destituírono do seu cargo o día 21 de agosto e escapou para o monte.

Asasinárono o garda civil Abel Martínez Prado, o falanxista Eladio Varela Alcalde e outros seis máis, cando o atoparon agochado nun piñeiral de Ribadofonte e coa xustificación de que non se detivera cando lle deran o alto. Manuel Brión non ía armado e aplicáronlle a Lei de Fugas.

Rexistrado como morto por hemorraxia interna a causa de ferida de arma de fogo.

Perseguido por ser “un peligroso comunista”.

Tamén sufriu o embargo dos seus bens.

Aos asasinos sometéronos a un proceso xudicial e a causa 1293/36 por estes feitos rematou sobresida.