Outeiral Outeiral, Juan-Francisco

Transportista e político, 40 anos. Casado con Encarnación González Reino; tiveron sete fillos. Veciños de Boiro. Irmán de Consuelo Outeiral Outeiral e cuñado de Juan Somoza Rebollido, Juanito o Chono, que fora alcalde na II República polo PSOE, exiliado.

Militante socialista, en 1935 presidiu a Agrupación Local do PSOE. Concelleiro de Boiro logo do triunfo da Fronte Popular (FP) nas eleccións de febreiro de 1936; desenvolvía este cargo cando se produce o golpe de Estado.

Tiña como compañeiros na Corporación de Boiro de 1936, entre outras persoas, a: José Martínez Virel, procesado; Rodrigo Álvarez Gantes, asasinado; Antonio Lago Outeiral, encarcerado; José Caballero Rubio, asasinado; Brígida Muñiz Suárez, encarcerada; Manuel Brión Suárez, executado; José-Benito Segade Torrado, encarcerado.

Depurado. Executado.

Destituído polos franquistas o día 21 de agosto de 1936 com o concelleiro. Detivérono meses despois.

Xulgado en consello de guerra en Santiago de Compostela (A Coruña) co resultado de sentenza á pena de morte.

A Juan-Francisco Outeiral Outeiral fusilárono no cemiterio de Boisaca co seu compañeiro da Corporación de Boiro, Rodrigo Álvarez Gantes. Con eles tamén executaron a: José Maceiras Vilasoa, Santiago Miranda Lago, Ramón Lojo Agrelo, Bautista Torrado Rivadulla e Braulio Castro Gallardo.

Morte rexistrada en Santiago de Compostela a causa dunha hemorraxia interna por fusilamento.