Lago Outeiral, Antonio

Carpinteiro e político, 45 anos. Casado. Veciño de Boiro.

Concelleiro en Boiro pola Fronte Popular (FP) despois das eleccións de febreiro de 1936. Nomeado depositario dos fondos municipais; desenvolvía este cargo cando se produce o golpe de Estado.

Tiña como compañeiros na Corporación de Boiro de 1936, entre outras persoas, a: José Martínez Virel, procesado; Rodrigo Álvarez Gantes, asasinado; José Caballero Rubio, asasinado; Brígida Muñiz Suárez, encarcerado; Juan-Francisco Outeiral Outeiral, executado; Manuel Brión Suárez, executado; José-Benito Segade Torrado, encarcerado.

Depurado. Fuxido. Encarcerado.

Despois do golpe de Estado de 1936 destituírono como concelleiro o día 21 de agosto e andou fuxido.

Foxe na evasión da lancha a motor San José nº 2, desde Cabo de Cruz, Boiro, ao porto de Leixões, Matosinhos (Portugal) o día 27/07/1936, fuga que organizara o alcalde en funcións de Boiro, José Martínez Virel. Os 19 fuxidos desembarcaron no porto de Leixões, prendéronos e recluíronos no Forte de São Bruno de Caxías, Oeiras (Portugal).

Nesta operación fuxiron os seguintes veciños de Boiro (A Coruña): Cipriano-Juan-Emilio Blanco Fuciños, funcionario municipal; Marcial de Diego Andreu, funcionario municipal; Antonio Ferreirós Martínez, mariñeiro; Antonio Lago Outeiral, carpinteiro; José Martínez Virel, mestre; José-Manuel Muñiz Santiago, mariñeiro; Manuel Ojea Torrecilla, mecánico; Juan-Antonio Somoza Outeiral, ferreiro; Ramón Somoza Rebollido, ferreiro; Victoriano Somoza Rebollido, ferreiro, e José Viturro Ozores, mariñeiro.

Tamén escaparon os veciños da Pobra do Caramiñal (A Coruña): Antonio Domínguez Fontán, funcionario municipal; Carlos-Segundo Iglesias Rodríguez, mecánico; Pastor Núñez Cariño, funcionario municipal; Antonio Pérez Gómez, mecánico, e Manuel-Venerando Porteiro Viña, funcionario municipal.

De Vilagarcía de Arousa (Pontevedra) fuxiron: Pedro Díaz Abalo, comerciante; José-Manuel-Bernardino Rodríguez Alarcón, médico, e Elpidio Villaverde Rey, industrial, deputado nacional por ER.

Declarado fuxido e en rebeldía, capturárono os franquistas no ano 1939.

Xulgado en consello de guerra en Ferrol (A Coruña) polo delito de adhesión á rebelión, na causa 8/39, co resultado de sentenza a cadea perpetua.

Tamén procesaron a José Viturro Ozores, condenado do mesmo xeito a cadea perpetua.

Ingresado no penal do Forte de San Cristóbal, Pamplona (Navarra) o día 24/10/1939.

Trasladado aos Talleres Penitenciarios de Alcalá de Henares (Madrid) o 14/12/1942.

Procesárono en 1937 no Tribunal Rexional de Responsabilidades Políticas da Coruña e indultárono no ano 1943.