Caamaño González, Manuel

Mariñeiro, 25 anos. Veciño de San Clemente do Pindo, Carnota.

Fuxido.

Despois de permanecer agochados no Monte Pindo durante máis dun ano, o sábado 16/10/1937 un grupo de 13 persoas de Carnota e Dumbría decidiron facerse coa motora O As de Sel, propiedade de Antonio Sel, e escapar da guerra e da represión á que os sometían a eles e aos familiares e veciños. Baixaron ao porto do Sinal e fixéronse co barco despois de ameazar á tripulación a punta de pistola. Incautaron combustible e provisións en Corcubión e Fisterra e, no medio do temporal, puxeron rumbo a Inglaterra. Aos dous día auxiliounos e remolcounos o vapor inglés SS Strib ata Bristol (Inglaterra). As autoridades inglesas, polo Pacto de no Intervención, devolvéronos a Cataluña, a través de Francia, e tiveron que loitar coas tropas republicanas.

Os 13 fuxidos eran os veciños de Lira Manuel Caamaño González e os de San Clemente do Pindo, Carnota Ángel Casais Caamaño; Luis Casais Casais, estudante; José-Joaquín Casais Piñeiro; José Piñeiro Casais; Manuel Piñeiro López; os irmáns Alfredo Piñeiro Riveiro e Constantino Piñeiro Riveiro. Tamén fuxiron os veciños de Santa Uxía do Ézaro, Dumbría (A Coruña) Domingo-Antonio Castro Rodríguez, Manuel-Francisco Ferrer Gándara, Manuel Lago Sambade e os irmáns Manuel Rodríguez Louro e Joaquín Rodríguez Louro.

Causa aberta en Ferrol (A Coruña) polo delito de deserción (non se ter presentado a filas e pola fuxida da motora As) co resultado de ser declarado fuxido e en rebeldía.