García Niebla, Juan

Mestre e político, 61 anos. Viúvo desde 1936. Veciño da Graña. Mestre nacional no ano 1895. Mestre en Betanzos (A Coruña). En 1902 fundou a Escola Pública de Caranza, en Ferrol, que dirixiu ata 1914. Despois pasou á Escola de Nenos de San Salvador de Serantes, á de Ferrol Vello e á de Canido. Impulsor do Día da Árbore.

Membro da Institución Libre de Ensinanza e director dunha revista pedagóxica.

Militante do PSOE e da Federación de Traballadores da Ensinanza da UXT (FETE-UXT) en Ferrol. Membro do Ateneo de Ferrol e das Irmandades da Fala.

Colaborador de El Correo Gallego, Pro-Cultura, Estudios Gallegos e Escuela Moderna.

Depurado. Encarcerado. Paseado.

Abríronlle un expediente de depuración como mestre nacional e queimáronlle os seus libros e documentos.

Detido no seu domicilio o día 11/08/1936 e ingresado no Plus Ultra; despois entregárono á forza pública franquista o día 16 de agosto e asasinárono o día 17 con outras 14 persoas.

Morte rexistrada en Ferrol a mans da forza pública preto do Castelo de San Felipe.

Con outros presos que sacaron do buque prisión Plus Ultra e da Escollera do Arsenal, pasearon o 17 de agosto en grupo, no cemiterio de Canido, a estas 15 persoas: Alfonso Abrodes Rey, xornaleiro; Manuel Besteiro Luaces, radiotelegrafista; Cipriano Canosa Caruncho, maquinista naval; Juan García Niebla, mestre; Ángel García Toribio, rexistrador da propiedade; Ángel Monteagudo Carro, militar; Avelino Parrilla Ares, militar; José Pérez Cisneros, carpinteiro; Jaime Quintanilla Martínez, médico; Alfonso Raja Coronado, militar; Ramón Ríos Sordo, maquinista naval; Juan Romalde Prieto, militar; Manuel Serantes Canosa, militar; Ramón-José Souto González, carpinteiro, e Jesús Tenreiro Prim, funcionario.

Soterrárono nunha fosa común no cemiterio de Catabois.