Gómez Carro, Américo

Fontaneiro e político, 23 anos. Veciño da Coruña, onde traballaba de fontaneiro.

Anarquista. Socio do Centro de Estudos Sociais Germinal.

Detivérono no ano 1933 acusado polos servizos de policía de provocar sabotaxes contra os patróns coruñeses con Arturo Meirás Martínez, 24 anos, fontaneiro; Antonio Prenas Illobre, 28 anos, albanel, ou José-Antonio Boedo Núñez, 24 anos, albanel.

Militante da CNT e das Xuventudes Libertarias (XXLL).

Fuxido. Encarcerado.

Foxe ao Principado de Asturias en xaneiro de 1937 e solicita o ingreso nas milicias de Xixón o día 10/01/1937. Combate no exército republicano durante a guerra civil na fronte asturiana como cabo do 219º Batallón Galicia, 6ª Brigada Mixta, 2ª División do III Corpo de Exército de Asturias, e, xa como tenente, no 262º Batallón de Infantería. Pertenceu á Agrupación Confederal Galaica.

Prendérono os rebeldes na guerra, estivo no campo de concentración de Camposancos, A Guarda (Pontevedra), de onde escapa o día 10/02/1938 con outros presos asturianos.

Foxe na evasión do bou Tiburón cun grupo de republicanos, desde Ferrol (A Coruña) cara Francia, o día 10/08/1938, data na que asaltaron o barco en alta mar, ameazaron á tripulación e conduciron o barco ao porto francés de Saint-Nazaire (Países do Loira, Francia), onde chegaron o día 13 de agosto. A fuga organizárana xentes de El Despertar Marítimo, vencellada a CNT da Coruña.

Fuxiron 24 mariñeiros galegos, aos que repatriaron de xeito inmediato; 14 mariñeiros da tripulación e oito asaltantes chegaron en tren a Barcelona e dous dos tripulantes volveron a Galicia por Irún (Guipúscoa).

Entre os fuxidos estaban os coruñeses: Ángel Chas González; Américo Gómez Carro, fontaneiro; Arturo Moreno Torres, zapateiro; Manuel Pérez Agrelo, mariñeiro, e Manuel Varela Sande. Os ferroláns Epifanio García González, funcionario; Manuel Gen Canosa, militar, e Saturnino Pita Fontenla, mariñeiro. Os veciños de Noia (A Coruña): Luis Louro García, mariñeiro e o seu irmán Ramón Louro García; Manuel Oviedo Piñeiro, mariñeiro; Manuel Suárez Abeleira e Ramón Villar Blanco, mariñeiro. Ramón Gómez Lage, propietario, de Ortigueira (A Coruña). Francisco Insua López, patrón de pesca, de Viveiro (Lugo). Francisco Lago Rodríguez, político, de Muros (A Coruña). Luis Otero López, maquinista naval, de Teis, Vigo (Pontevedra). Manuel Palmeiro Romero, de Miño (A Coruña), e Gerardo Torreiro López, mestre, de Arzúa (A Coruña).

Causa aberta en Ferrol polo delito de rebelión militar (fuxida do bou Tiburón).

Prendérono e retomouse o seu procesamento co resultado de sentenza a cadea perpetua.