Manrique Martín, Fructuoso

Carabineiro e político, 64 anos. Casado con Josefa García Barros. Veciños de Ourense. Estudou a carreira militar. O seu primeiro destino no Corpo de Carabineiros sería en Santa María Madanela de Cádavos, A Mezquita (Ourense), onde atendía a Aduana na fronteira con Portugal; alí coñeceu e casou coa súa dona Josefa. Máis tarde trasladárono a Jaca (Huesca) e logo foi comandante en Ferrol (A Coruña).

O día 28/02/1929 destinárono como tenente coronel a Alxeciras (Cádiz) e o día 28/11/1929 a Xirona. No ano 1931 nomeárono xefe do Corpo de Carabineiros da provincia de Pontevedra, xa a piques de xubilarse; acadando a xubilación na aplicación da Lei Azaña co grao de coronel.

Fructuoso e a súa dona pasaron a vivir a Ourense, co seu cuñado solteiro Marcial García Barros, tenente de Seguridade, fusilado. Tamén viviu con eles o seu sobriño Sergio García Ferrera, estudante e fillo do seu cuñado Antonio-Bernardo García Barros.

Durante a II República presidiu Esquerda Republicana (ER) en Ourense. Despois do triunfo da Fronte Popular (FP) en febreiro de 1936 designárono gobernador civil interino de Ourense, onde tivo como asesor a Eduardo París Villar e elixírono compromisario para a elección do presidente da República en abril de 1936, Manuel Azaña Díaz.

Paseado.

Despois do golpe dos militares sublevados o día 25/07/1936 detiveron a Fructuoso e aos seus cuñados Marcial e Antonio-Bernardo.

Pasou tres meses interno na Prisión Central de Celanova (Ourense) e, coa escusa dun traslado á cadea do Barco de Valdeorras (Ourense), asasinárono os fascistas o día 1 de novembro na zona chamada Arca Aberta.

Nesa data e lugar pasearon a: Fructuoso Manrique Martín, carabineiro; Eligio Núñez Muñoz, mestre; Aquilino Sánchez Rodríguez, alcalde do Carballiño, e Jacinto-Eloy Santiago García, mestre e xornalista.

Os executores, non contentos co seu asasinato, tamén queimaron a súa casa de Cádavos.

Procesárono no Tribunal Rexional de Responsabilidades Políticas da Coruña e indultárono no ano 1958.