Martínez Losada, Ramón

Farmacéutico e político. Casado con María Fernández Pérez. Veciños de Monforte de Lemos. Licenciado en Farmacia pola Universidade de Santiago de Compostela (USC). Nomeárono farmacéutico da Armada en 1915; boticario tamén en Monforte de Lemos.

Concelleiro da súa vila de residencia en 1922. Na ditadura militar de Miguel Primo de Rivera Orbaneja desenvolveuse como deputado provincial.

Na II República foi presidente da Asociación Patronal da Industria e do Comercio de Monforte de Lemos.

Falanxista.

Represor.

Xefe local de Falanxe de Monforte de Lemos. Despois do triunfo dos rebeldes, nomeárono xefe provincial de Falanxe de Lugo, en xuño de 1937, na substitución de José-María Fenollera Velón.

A Manuel Saco Rivera, que tiña relación económica e política co xefe provincial de Falanxe de Lugo Mario-Benito-Nicolás González Zaera e aos que acusaran de detraer fondos do partido, asasinárono o día 28/08/1938, nun atentado político de escuras motivacións, cando o abateron a tiros ao saír do Casino de Sarria (Lugo). Semella que o asasinou un grupo falanxista rival, a Escuadra Negra de Eirexalba; os autores materiais serían: Manuel Díaz López, Chaquetón, e Manuel Castro Castro, Eirexalba, inducidos polo ex-xefe local de Falanxe en Sarria, Eduardo Gómez Rodríguez-Requejo.

Prenderon aos autores materiais do crime, a Eduardo Gómez e ao xefe provincial de Falanxe de Lugo, Ramón Martínez Losada, ao que cesaron no seu cargo.

Sometidos a consello de guerra, aos autores materiais executáronos e Eduardo Gómez rematou na cadea. A Eduardo indultouno o Goberno de Francisco Franco en abril de 1940.

Despois da súa detención substituíuno na Falanxe de Lugo Ramón Ferreiro Rodríguez-Lago.