Pazos Liñares, Ramón

Labrego, 48 anos. Casado con María Liñares Torreira, a quen procesaron e puxeron a disposición da autoridade gobernativa. Veciños do Castro, Santa Baia de Lañas, A Baña. Estivo emigrado en Cuba. Tío do guerrilleiro antifranquista Jesús-Domingo Pazos Mesías, o Moreno, morto en enfrontamento coas forzas represoras en Vimianzo (A Coruña).

Militante de Esquerda Republicana (ER) na Baña.

Fuxido. Executado.

Foxe e capturárono os franquistas no faiado dunha casa; non opuxo resistencia.

Xulgado en consello de guerra en Santiago de Compostela polo delito de rebelión, na causa 705/36, co resultado de sentenza á pena de morte.

Neste xuízo condenaron á pena de morte a: Alfredo Paz Lemus, Ramón Pazos Liñares, Manuel Quinteiro Vidal e Benjamín Troitiño Beiro; condenas de cadea perpetua para: Jesús Mourelle Ramos, Gumersindo Pereiró Sanmartín e Antonio Santos Pérez; sentenzas de 15 anos de prisión para: Florindo Mosquera Ríos, Maximino Quinteiro Vidal, Herminio Suárez Arnejo e José Suárez Arnejo; pena de 12 anos e un día para Jesús-María-Juan Caamaño Caamaño; auto de sobresemento para Teresa Martínez Vieito e de absolución para José Caamaño Caamaño; quedaron en liberdade: Antonio Caamaño Rodríguez e José Fandiño Vilaseco.

Fusilárono os golpistas no cemiterio de Boisaca, Santiago de Compostela.

Procesárono no Tribunal Rexional de Responsabilidades Políticas da Coruña e indultárono no ano 1943.