Rodríguez Fernández, Domingo

Labrego, 61 anos. Casado con Amalia López Ojea, asasinada con el. Veciños de Soulecín. Pai de Domingo Rodríguez López, o Xirolo, Inca, Rogelio Rodríguez López, Sebastián Rodríguez López e Alfonso Rodríguez López, o Galego, fuxidos ao monte despois do asasinato dos seus pais e que caerían en combate contra das forzas franquistas entre 1941 e 1949. Pai tamén de Consuelo Rodríguez López, Chelo, e Antonia Rodríguez López, que actuaron como axentes do Servizo de Información Republicano (SIR) e como enlaces da guerrilla, estiveron presas en varios cárceres e que cando a súa vida se puxo en perigo real, tamén escaparon ao monte.

Despois do nacemento dos seus dous primeiros fillos, Francisco e Rogelio, Domingo emigrou a Cuba de onde volvía a miúdo, retornando definitivamente no ano 1928. Os cartos da emigración permitíronlles levar unha vida axeitada.

Paseado.

Morte rexistrada no Barco de Valdeorras, sen que se mencione a causa da súa morte.

Asasinado coa súa dona en Soulecín por un pelotón de lexionarios que mandaba o entón tenente Sergio Peñamaría de Llano.

Soterráronos nunha fosa común en Sampaio, Soulecín.

O lexionario que se encargou da súa execución a tiros foi o xixonés Luis Zarracina Rodríguez, quen sería axustizado o día 13/05/1940 por Rogelio e Sebastián, fillos do matrimonio morto.