Seijo Don, José

Albanel. Veciño de Oleiros (A Coruña).

Militante da CNT.

Fuxido. Procesado. Axustizado.

Formou parte dos grupos que operaban nos Castros, na Coruña, e San Pedro de Nós, Oleiros (A Coruña). Un deses grupos eliminou na Barcala, Santa María de Cambre (A Coruña), ao axente do Servizo de Información e Policía Militar (SIPM) José García Rioboo. O grupo desta acción formábano: Amador Domínguez Pan, Jaime Pimentel, (organizador do grupo), José Garrido Pasandín e, o seu fillo, Eduardo Garrido Otero.

Ao grupo desarticulouno a policía franquista e José Seijo pasou á clandestinidade. A José Garrido e a Eduardo Garrido prendéronos e executáronos.

Xulgado en consello de guerra na Coruña polo delito de asasinato, na causa 711/39, co resultado de sentenza de sobresemento.

Con posterioridade ingresou na guerrilla antifranquista.

Semella que finou axustizado polos seus compañeiros na Ermida dun tiro na cabeza en 1948, por un grupo que comandaba José-María Castelo Mosquera, con Rosendo Sar Lantes, José-Antonio Cortiñas Blas e Manuel Ramiro Souto.