Seoane García, Venancio

Camareiro, sindicalista e político, 48 anos. Veciño da Coruña.

Membro e dirixente da Agrupación Socialista (AS) da Coruña e afiliado á UXT. Dirixente tamén da Sociedade de Dependentes do Casino coruñés.

Paseado.

Prendérono despois do alzamento, o día 06/08/1936, canda outros dirixentes sindicais polo mantemento da folga xeral, que paralizaba parte da cidade herculina, e os fascistas acusáronos de desobediencia e incumprimento dos bandos de guerra.

Despois do triunfo da sublevación militar figuraba nos informes da policía represora como persoa perigosa e sen capturar, aínda que o fusilaron aos poucos días.

Venancio figura, con outros, nun informe da Dirección Xeral de Policía “como individuos peligrosos que aún no fueron capturados, que se sepa en este Departamento, pueden citarse los siguientes, huidos o desaparecidos de esta localidad, cuyo paradero se desconoce”

Morte rexistrada no Campo da Rata, na Coruña, ao ser pasado polas armas polos golpistas.

O día 09/08/1936 executaron neste lugar: Cipriano Alvite Alonso, carpinteiro; Francisco Ballón Pequeño, peón; José Quintas Pena, electricista; Jaime Rodríguez García, metalúrxico; Julio Sabio Sanmartín, empregado, e Venancio Seoane García, camareiro.

Soterrárono o día 9 de agosto nunha fosa común no cemiterio de San Amaro, na Coruña, con Cipriano Alvite Alonso, Francisco Ballón Pequeño, José Quintas Pena, Jaime Rodríguez García, Julio Sabio Sanmartín e un descoñecido duns 50 anos.

Abríronlle na Coruña o expediente 138/41 por responsabilidades políticas.

Outras fontes sinalan que o fusilaron o día 14/08/1936.