Sabio Sanmartín, Julio

Empregado, sindicalista e político, 40 anos. Casado con Teresa Fernández Rodríguez; tiñan catro fillos. Veciños da Praza de Azcárraga, 10-2º, na Coruña.

Tesoureiro en 1936 do Sindicato de Traballadores de Oficinas da Coruña, da UXT. Militante do PSOE.

Apoderado da candidatura da Fronte Popular (FP) nas eleccións de febreiro de 1936.

Paseado.

Detido polos rebeldes na rúa Real, na Coruña, con outros líderes sindicais, pola continuación da folga xeral e acusárono dos delitos de desobediencia e incumprimento dos bandos de guerra.

Morte rexistrada no Campo da Rata, na Coruña, ao ser pasado polas armas polos falanxistas.

O día 9 de agosto asasinaron a: Cipriano Alvite Alonso, carpinteiro; Francisco Ballón Pequeño, peón; José Quintas Pena, electricista; Jaime Rodríguez García, metalúrxico; Julio Sabio Sanmartín, empregado, e Venancio Seoane García, camareiro.

Manifestou diante do xuíz que se topara na rúa Real con Francisco Mazariegos Martínez, quen lle pedira que o acompañase ao Goberno Civil para resolver uns asuntos relacionados co conflito do porto; como había moito barullo alí, non resolveron, deixou o edificio e dirixiuse, logo dunhas xestións, cara a súa casa, cando o sorprendeu o tiroteo. Cando pararon os tiros decidiu encamiñarse de novo para o seu domicilio e prendérono na rúa Real forzas de Infantería, que o xuntaron cos outros detidos. Tamén manifestou que non interviñera nos actos de resistencia contra o exército golpista.

Soterrárono o día 9 de agosto nunha fosa común no cemiterio de San Amaro, na Coruña, con Cipriano Alvite Alonso, Francisco Ballón Pequeño, José Quintas Pena, Jaime Rodríguez García, Venancio Seoane García e un descoñecido duns 50 anos. Trasladárono a un nicho en febreiro de 1942.