Villar Cimadevila, Manuel

Xornalista e político, 40 anos. Casou en Vigo (Pontevedra) con Enriqueta Villar Montes; tiveron dous fillos. Veciños do barrio do Pino, en Vigo. Irmán de Enrique Villar Cimadevila e de Luis Villar Cimadevila, encarcerados e mortos na cadea, e de Plácido Villar Cimadevila, encarcerado. Cuñado de Manuel Blanco Fernández, encarcerado. Traballou como empregado no comercio La Innovación, da Porta do Sol, na cidade viguesa.

Candidato nas eleccións municipais de 1931 pola Organización Republicana Galega Autónoma (ORGA); dirixente provincial do Partido Republicano Galego (PRG) e despois de Esquerda Republicana (ER).

Detido en xaneiro de 1935, na causa 77/35, baixo a acusación de pertencer ao Socorro Rojo Internacional (SRI). Nesta investigación tivo un papel destacado o tenente da Garda Civil Francisco González Rodríguez, o Rabioso.

Promotor e director do semanario pontevedrés Clarín.

Paseado.

Os franquistas prendérono despois do golpe de Estado e enviárono á cadea.

O día 06/10/1936 un grupo de falanxistas, gardas civís e un cura, sacaron a seis persoas da prisión do frontón da rúa María Berdiales, en Vigo, leváronos a Vincios e asasináronos en dous grupos; tres morreron en Pasaxe (José Comesaña Pérez, Antonio Comesaña Pérez e Emilio Giráldez Rodríguez) e outros tres en Bichicáns, Vincios (Emilio Comesaña Sobreira, Fernando Costas Iglesias e Manuel Villar Cimadevilla).

Morte rexistrada en Gondomar a causa de feridas producidas por disparos de arma de fogo.

Soterráronos a todos no cemiterio de San Vicente de Mañufe, en Gondomar.

Nalgunhas fontes aparece como Cimadevilla de segundo apelido.