Fernández Castro, Tomás

Mineiro, 23 anos. Casado con Adonina Vázquez García; tiña un fillo: Justo-Tomás.

Afiliado ás Xuventudes Socialistas Unificadas (XSU). Militante do PSOE.

Fuxido. Morte en enfrontamento.

Miliciano do exército republicano no Principado de Asturias, acadou o grao de capitán no 216º Batallón de Infantería.

Tempo despois estivo nos grupos de guerrilleiros do Bierzo (León).

A finais do ano 1939 formou parte do grupo de oito socialistas, que capitaneados por Marcelino Fernández Villanueva, Gafas, tentaron acadar Porto (Portugal) para escapar da represión dos golpistas. Compoñían a partida: Gafas; Tomás Fernández Castro, Capitán Fantasma; Manuel-Luis Gómez Bueno, Pambarato; Aladino Suárez González, Aladino; Ovidio González Vázquez, o Pollón; Amador Pello Bárcena; José-Benjamín Pello Bárcena e Ángel Rodríguez Saldaña.

Diante das presións da policía portuguesa, tiveron que regresar á provincia de Ourense e, moitos deles, de alí pasaron outra vez ao Principado de Asturias na procura de armas.

No verán de 1940 Gilberto Cuadrado Soto, Gipi, pasou a Portugal cun importante grupo de guerrilleiros coa intención de acadar Porto; eran uns vinte.

Na viaxe cara Portugal, cando descansaban en Primout entre o gando lanar, un pastor denunciou á Garda Civil de Páramo de Sil a presenza dos fuxidos na zona. No posterior enfrontamento perdeu a vida Tomás Fernández, cando protexía a retirada dos seus compañeiros.

Soterrárono nunha fosa común no cemiterio de Primout.