Fernández Freijeiro, Manuel

Militar e político, 60 anos. Militar auxiliar de Intendencia retirado. Era veciño da Praza do Peixe, en Cedeira (A Coruña). Durante a súa estadía en Ferrol dirixiu o Real Coro Toxos e Froles.

Próximo a Esquerda Republicana (ER), na II República elixírono alcalde de Cedeira e volveu ser alcalde a partir de marzo de 1936. Desenvolvía este cargo cando se produce o golpe de Estado.

Tiña como compañeiros da Corporación de Cedeira de 1936, entre outras persoas, a: José-Cipriano Durán Fraguela, executado; Jesús Lourido Arriví, asasinado; José Vergara López, pola UXT, asasinado; Nicasio Pérez Senra, asasinado; José Lago Beceiro, executado; José López Teijeiro, asasinado; Andrés Arriví Caneiro, encarcerado; Antonio Pérez Muíño, encarcerado.

Executado.

Cando se produce o golpe intervén nos primeiros momentos no Comité de Defensa da República de Cedeira, que proclamou nun bando a declaración do estado de guerra. Púxose enfermo e tomaron a dirección José Vergara López e José Bernabé Martínez. Detido na súa casa polos falanxistas.

Xulgado en consello de guerra en Ferrol polo delito de rebelión militar, na causa 296/36, co resultado de sentenza á pena de morte.

O día 18 de decembro executaron no Castelo de San Felipe, en Ferrol, a: Enrique Alonso Teijeiro, mestre; Antonio Ameneiro Brage, labrego; Adolfo Bouzón Teijeiro, mariñeiro; Antonio Castillo Domínguez, veterinario; José-Cipriano Durán Fraguela, labrego; Manuel Fernández Freijeiro, militar; Ginés Fernández Rodríguez, estudante (fillo de Manuel Fernández Freijeiro), Miguel Fernández Santos, funcionario; Isaac Forneiro Barandela, mestre; Antonio Iglesias Freire, mariñeiro; José Lago Beceiro, labrego; Enrique Martínez Teijeiro, chofer; Rufino Redondo Senra, mestre, e Francisco Rodríguez N., barbeiro e músico.

Todos eran veciños de Cedeira, agás Antonio Ameneiro, que era de Cabanas (A Coruña).