García Molares, Rogelio

Xornaleiro, 28 anos. Solteiro. Veciño de Cabral.

Fuxido. Morte en enfrontamento.

Loitou contra os militares rebeldes nas barricadas de Lavadores, en Vigo.

Desertou do exército franquista.

Formou un grupo de fuxidos, que foi o único grupo estable de Pontevedra que chegou a converterse nunha partida guerrilleira.

En 1938 organizou a partida co seu irmán José García Molares; Ramón Pereira Antelo, o Parrillero, zapateiro; Manuel Simón Campos, o Xanote, de Cabral; Manuel Rodríguez Fernández, o Coxo de Cabral; Guillermo Santos Caride, o Quique; Luis Blanco López; Julio Guillén Biel, o Biel; Vicente Guillén Biel, José-Luis Quintas Figueroa, Quintas; Diego Valero González; Delmiro Barreiro Cubeiro e varios máis, actuando na zona de Cabral.

Xulgado en varias causas en Vigo co resultado de ser declarado fuxido e en rebeldía.

Nos primeiros meses fixeron varios golpes económicos e tomaron represalias contra os colaboradores do Réxime. Grupo guerrilleiro ao que se incorporou en 1939 o militante comunista Claudio Rodríguez Vázquez, Penis, Crispín, e tamén Jesús Lago González, Petrillas. O grupo integrábano comunistas e anarquistas.

A José García Molares, acusárono da morte do garda xurado, Manuel Pereiro Bernárdez, coa participación tamén de Julio Guillén Biel, o Biel, Ramón Pereira Antelo e José-Luis Quintas Figueroa.

O día 16/10/1939 ao seu grupo rodeouno a Garda Civil en Vilar de Infesta cando asaltaban o domicilio dun falanxista, o Casas. A Rogelio feriuno de gravidade o disparo accidental do seu compañeiro Petrillas; logo rematouno outro compañeiro. O resto dos guerrilleiros conseguiu escapar.

Morte rexistrada por mor dunha hemorraxia interna e destrución da masa cerebral.

O seu cadáver apareceu na Millarada, Vilar de Enfesta.

Logo da súa morte o seu irmán José reorganizou o grupo, que xa controlaba Manuel Simón Campos, Xanote.

Segundo Bernardo Máiz, Rogelio morreu en outubro de 1939 no ataque a Constante Chas, dono dun serradoiro en Vilar de Infesta, Redondela, e destacado expertos en dar o paseo ás persoas das esquerdas, que se sabía na listaxe negra da guerrilla; Constante reaccionou ao asalto e matou a Rogelio.