Lago Sambade, Manuel

Mariñeiro, 26 anos. Veciño de Santa Uxía do Ézaro, Dumbría.

Fuxido. Encarcerado.

Despois de permanecer agochados no Monte Pindo durante máis dun ano, o sábado 16/10/1937 un grupo de 13 persoas de Carnota e Dumbría decidiron facerse coa motora O As de Sel, propiedade de Antonio Sel, e escapar da guerra e da represión á que os sometían a eles e aos familiares e veciños os franquistas. Baixaron ao porto do Sinal e fixéronse co barco despois de ameazar á tripulación a punta de pistola. Incautaron combustible e provisións en Corcubión e Fisterra e, no medio do temporal, puxeron rumbo a Inglaterra; aos dous días auxiliounos e remolcounos o vapor inglés SS Strib ata Bristol (Inglaterra). As autoridades inglesas, polo Pacto de no Intervención, devolvéronos a Cataluña, a través de Francia, e tiveron que loitar no exército republicano.

Os 13 fuxidos eran os veciños de Lira, Carnota, Manuel Caamaño González e os do Pindo, Carnota, Ángel Casais Caamaño; Luis Casais Casais, estudante; José-Joaquín Casais Piñeiro; José Piñeiro Casais; Manuel Piñeiro López; os irmáns Alfredo Piñeiro Riveiro e Constantino Piñeiro Riveiro. Tamén fuxiron os veciños do Ézaro, Dumbría, Domingo-Antonio Castro Rodríguez; Manuel-Francisco Ferrer Gándara; Manuel Lago Sambade; e os irmáns Manuel Rodríguez Louro e Joaquín Rodríguez Louro.

A moitos deles procesáronos en Ferrol (A Coruña) o día 20/11/1937, na causa 474/37, polos delitos de piratería, roubo e rebeldía.

Pasou a Francia e logo a Barcelona, onde se alistou no Exército Popular republicano.

Capturárono os sediciosos.

Xulgado en consello de guerra polo delito de deserción e pola fuxida do vapor As co resultado de sentenza a 12 anos e un día de prisión.

Interno na Colonia Penitenciaria da Illa de San Simón, Redondela (Pontevedra), publicaron a súa liberdade condicional provisoria no BOE nº 5 do día 05/01/1943.