López Novo, Vicente

Tiña 18 anos.

Militante da CNT.

Fuxido. Morte en enfrontamento.

Desde finais de 1947 formou parte da V Agrupación do Exército Guerrilleiro de Galicia (EGG), que lideraba Benigno Andrade García, Foucellas, e José Remuiñán Barreiro, Ricardito, á que se incorporou con Julio Bazarra Constenla. Nesta V Agrupación coincidiu con Ricardo Fernández Carles e Florentino Menéndez Palacio, Tino, Asturiano.

Nos primeiros meses de 1948 Foucellas decidiu dividir o grupo en dúas partidas, unha comandada por Miguel Nicolás Esperante, Corcheiro, e outra por Rufino. Coa morte do Corcheiro en Silleda o día 09/04/1948, volveron reunificarse.

A partida de Benigno Andrade García axustiza ao falanxista Jesús Cuñarro Mosteiro na súa taberna de Santiago de Cercio, Lalín (Pontevedra) o día 10/02/1948. Interveñen na acción Foucellas, Florentino Menéndez Palacio, José Remuiñán Barreiro, Julio Bazarra Constenla, Vicente López Novo, Miguel Nicolás Esperante e Eugenio Rueda Perosanz.

A este grupo avistouno a Garda Civil en Loureiro o 19/05/1948, cando descansaba nun alpendre da casa de Carmen Mosqueira Parajo. Nun primeiro enfrontamento, no fogo cruzado, morre o número da Garda Civil, Manuel Jardón Castro. O sarxento Antonio Otero Louro, ao mando dos gardas civís, ordena incendiar o alpendre onde se refuxiaban os guerrilleiros. Manuel Agrasar Cajaraville, Barbarroxa, morreu polos disparos das metralladoras xunto con Vicente López Novo, Rufino; Florentino Menéndez Palacio, Tino, e Ricardo Fernández Carles.

Soterráronos nunha fosa común no cemiterio de Santa María de Luou.

Dous guerrilleiros logran fuxir, Benigno Andrade García, Foucellas, e José Remuiñán Barreiro, Ricardito; retiráronse á zona de Curtis (A Coruña).