Moreno Casado, Manuel

Zapateiro, 23 anos.

Militante da UXT e afiliado das Xuventudes Socialistas (XXSS) de Porcuna.

Fuxido. Morte en enfrontamento.

Cando se produce o golpe dos rebeldes uniuse ás milicias e logo ao exército republicano; foi comisario político.

Cando rematou a guerra achábase en Valencia e volveu a Porcuna. Capturárono os franquistas.

Xulgado en consello de guerra en Xaén, o día 08/06/1940, co resultado de sentenza a 30 anos de prisión.

Interno no cárcere de Xaén e na Prisión Central de Celanova (Ourense) desde o día 04/10/1940 ao 18/05/1943, data na que o trasladaron ao campo de concentración das minas de Santa María de Casaio, Carballeda de Valdeorras (Ourense).

O día 30/06/1944 fuxiu do campo con Florentino Pérez Rivas e incorporouse á guerrilla leonesa, no grupo de Marcelino de la Parra Casas, Parra.

En novembro de 1944 incoóuselle un expediente por responsabilidades políticas.

Xulgado no Tribunal Militar de León na causa 97/45.

Miguel Cuellas Gómez, Artillero, era o responsable de que o seu grupo estivera agochado en Columbrianos, na casa de Catalina Martínez Núñez, en contra das ordes superiores, pois sospeitábase que ese domicilio xa o controlaban as forzas represoras.

Despois da delación da confidente e antiga enlace Evangelina Álvarez Álvarez ao capitán da 4ª Compañía da 108ª Comandancia da Garda Civil, Felipe Romero Alonso, un numeroso grupo de gardas civís e membros do Exército rexistraron a casa o día 05/06/1945.

Os guerrilleiros agochábanse nun falso teito da cociña da casa duns 50 cm de alto; descuberto o agocho, metralláronos ata a morte, sen que puideran defenderse e morreron os tres fuxidos: Miguel Cuellas Gómez, Artillero; Robustiano Arias Carujo, Felipe, e Manuel Moreno Casado, Pucherillo, Andaluz. Á dona da casa, Catalina Martínez Núñez, cribárona a tiros na habitación contigua e ao seu sobriño, Pedro García Tirado, responsable de ter construído o agocho e que estaba fóra do domicilio, conducírono e asasinárono a carón da súa tía.

Como consecuencia da desfeita de Columbrianos, moitos enlaces e colaboradores quedaron expostos. Ao día seguinte, o 6 de xuño, caeu Ángel Ovalle Bodelón, de Camponaraia (preto de Ponferrada), un dos colaboradores máis activos; traballaba en Mineiro Siderúrxica de Ponferrada (MSP), onde o buscaron membros da Garda Civil; fuxiu e alcanzárono no monte Castro, en Columbrianos, onde o mataron de oito tiros de mosquetón e 13 de subfusil.