Novo Alfeirán, Benigno

Mariñeiro, 28 anos. Veciño de Malpica de Bergantiños.

Fuxido. Encarcerado.

Foxe a Francia na motora San Adrián, da que era capitán Francisco Fariña Chouciño, o día 27/06/1938; eran 26 as persoas que escapaban. Na lancha Estrella Polar achegáronse de Malpica de Bergantiños ás Illas Sisargas, onde se atopaba a motora. Despois de tres días de travesía chegaron preto de Brest (Bretaña, Francia). Un bote de carabineiros franceses levounos diante das autoridades que lles deron a escoller entre volver a Malpica de Bergantiños ou pasar á zona republicana; catro homes regresaron á casa e o resto marcharon a Barcelona para seguir loitando contra dos franquistas.

Entre os 26 fuxidos estaban: Manuel Alfeirán Carrillo, Cándido-Ramón Carrillo Cousillas, político; Jesús Castro Amigo, José Castro Amigo, Francisco Fariña Chouciño, mariñeiro; Miguel Garrido Blanco, motorista; Celestino Garrido Carrillo, patrón; Luis Garrido Carrillo, mariñeiro; Jesús Garrido Garrido, patrón; Pedro Garrido Varela, armador; Benigno Novo Alfeirán, mariñeiro; Luciano Rodríguez Alfeirán, armador; Manuel-L. Rodríguez Verdes, Luis Rodríguez Villar, José Sande Lois, mestre; Pedro Veres García, mariñeiro; Pedro Veres Varela, mariñeiro, e Manuel Villar Novo, patrón de cabotaxe.

Regresou a España para loitar co exército republicano na guerra civil.

Ao remate da contenda española volve a Francia e internárono no campo de Argelès-sur-Mer (Pireneos Orientais, Occitania, Francia).

Volve novamente para España, captúrano os rebeldes e pasa dous anos na cadea.

Xulgado en consello de guerra en Ferrol (A Coruña) polo delito de rebelión militar (fuga da lancha a motor San Adrián) co resultado de sentenza a 12 anos de prisión.