Castaño Otero, Francisco-José-Ramón

Comisionista, político e sindicalista, 30 anos. Veciño de Padrón (A Coruña).

Militante do PSOE e da UXT. Membro da Agrupación Socialista Obreira de Oficios Varios La Fraternidad, de Padrón.

No ano 1931 dirixiu o semanario El Escarabajo de Pontecesures.

Encarcerado. Executado.

O presidente do Comité de Defensa da República en Padrón fronte aos sublevados era Daniel Caamaño Eiras; tamén figuraban: Andrés García de la Riva Colombo, da UXT; Andrés-Genaro Rey Baltar, de Esquerda Republicana (ER); Antoliano Correa Jamardo, concelleiro da Fronte Popular (FP); José Calvo Rivas, de ER; Juan Ribeiro Aboy; Francisco-José-Ramón Castaño Otero e Ramón Piñeiro Romero; posiblemente tamén estarían José-Ramón Millares Gil e Jaime Caamaño Comparada.

Despois da sublevación militar prendérono e ingresárono na cadea en Padrón; trasladárono a Santiago de Compostela o día 30/08/1936.

Xulgado en consello de guerra en Santiago de Compostela o día 16/11/1936 polo delito de traizón, na causa 239/36, co resultado de sentenza á pena de morte.

Neste xuízo condenaron á pena de morte a: Jaime Caamaño Comparada, Francisco-José-Ramón Castaño Otero, Antoliano Correa Jamardo, José-Ramón Millares Gil e Andrés-Genaro Rey Baltar; castigaron coa cadea perpetua a José Calvo Rivas e declararon fuxidos a: Daniel Caamaño Eiras e Andrés García de la Riva Colombo.

A todos eles fusiláronos no cemiterio de Boisaca.