Rey Baltar, Andrés-Genaro

Labrego, axente de embarque e político, 49 anos. Casado; tiñan un fillo e dúas fillas: Ataulfo, Carmen e Manuela. Veciños de Padrón. Propietario e innovador agrario. Irmán de Ramón Rey Baltar, escritor afincado na República Arxentina, e de Ángela Rey Baltar.

Militante da UXT e da Agrupación Socialista (AS) de Padrón.

Executado.

O presidente do Comité de Defensa da República en Padrón era Daniel Caamaño Eiras e tamén figuraban: Andrés García de la Riva Colombo, da UXT; Andrés-Genaro Rey Baltar, de Esquerda Republicana (ER); Antoliano Correa Jamardo, concelleiro da Fronte Popular (FP); José Calvo Rivas, de ER; Juan Ribeiro Aboy; Francisco-José-Ramón Castaño Otero e Ramón Piñeiro Romero; posiblemente tamén estarían José-Ramón Millares Gil e Jaime Caamaño Comparada.

Despois do golpe militar detivérono e recluírono no cárcere de Padrón ata o día 30/08/1936 en que o trasladaron a Santiago de Compostela.

Xulgado en consello de guerra en Santiago de Compostela o día 16/11/1936 polo delito de traizón, na causa 239/36, co resultado de sentenza á pena de morte.

Neste xuízo condenaron á pena de morte a: Jaime Caamaño Comparada, Francisco-José-Ramón Castaño Otero, Antoliano Correa Jamardo, José-Ramón Millares Gil e Andrés-Genaro Rey Baltar; castigaron coa cadea perpetua a José Calvo Rivas e declararon fuxidos a: Daniel Caamaño Eiras e Andrés García de la Riva Colombo.

A todos eles fusiláronos os golpistas no cemiterio de Boisaca.