Correa Jamardo, Antoliano

Xastre e político, 39 anos. Casou en 1916 en Padrón con Ángeles Forján; tiveron dúas fillas: María de los Ángeles e Margarita. Veciños de Padrón, onde tiña unha xastería na rúa Gasset e Artime. Tamén foi dono dun salón de baile na súa localidade.

Concelleiro de Padrón en 1931 polo Partido Republicano Radical (PRR) e en 1932 pola Organización Republicana Galega Autónoma (ORGA); foi terceiro tenente de alcalde. Tamén era concelleiro en 1936 cando se produce o golpe de Estado.

Tivo como compañeiro na Corporación de Padrón, entre outras persoas, a Eduardo Castroagudín Pérez, asasinado.

Executado. Sancionado.

O presidente do Comité de Defensa da República en Padrón fronte aos rebeldes era Daniel Caamaño Eiras e tamén figuraban: Andrés García de la Riva Colombo, da UXT; Andrés-Genaro Rey Baltar, de Esquerda Republicana (ER); Antoliano Correa Jamardo, concelleiro da Fronte Popular (FP); José Calvo Rivas, de ER; Juan Ribeiro Aboy; Francisco-José-Ramón Castaño Otero e Ramón Piñeiro Romero; posiblemente tamén estarían José-Ramón Millares Gil e Jaime Caamaño Comparada.

Prendérono os fascistas e recluírono na cadea de Padrón ata o día 30/08/1936, data na que o trasladaron á prisión de Santiago de Compostela (A Coruña).

Xulgado en consello de guerra en Santiago de Compostela o día 16/11/1936 polo delito de traizón, na causa 239/36, co resultado de sentenza á pena de morte.

Neste xuízo condenaron á pena de morte a: Jaime Caamaño Comparada, Francisco-José-Ramón Castaño Otero, Antoliano Correa Jamardo, José-Ramón Millares Gil e Andrés-Genaro Rey Baltar; castigaron coa cadea perpetua a José Calvo Rivas e declararon fuxidos a: Daniel Caamaño Eiras e Andrés García de la Riva Colombo.

Fusiláronos a todos eles no cemiterio de Boisaca.

Con posterioridade embargáronlle os seus bens.